يبدو لي ..
ان الحقايق مش حقايق 
والتاريخ بقى شيء يضايق 
دوشونا بماضي ولى وراح
قالوا وعادوا .. ان لينا جدور
وتاريخ وحضارة واصل ونور
وكل ده كله .. مات وارتاح
لا بينا وبينهم اى دليل
ولا اى شبه .. او حتى مثيل
و بص شمالك
أوبص يمين 
واسأل حالك
احنا ولاد مين ؟!
يبدو لي .. 
ان احنا هجين
ما بين ناس
وناس تانيين 
حاجه كده .. 
مقسومه اتنين
احنا ولاد توت عنخ امون
واللا ولاد هكسوس ومجوس ؟!
احنا عددنا ١٠٠ مليون 
بس ناخر فينا .. الدود والسوس
احنا سلالة ابن العاص
واللا حفايد بطليموس ؟! 
كلام و اترص ف الكراس 
وحروف تايهه ف قلب قاموس
احنا جنود حطين وجالوت 
واللا ده كله كلام ف كلام ؟!
طب ازاي نتساق بالنبوت 
و للسلطان دايما .. خدام ؟!
يبدو لي ..
ان احنا هلام
حاجه كده .. 
راجعه ورا .. مالهاش قدام
وقال احنا ولاد محفوظ و زويل !!!
ده احنا جهل .. طلعله وشوش
بعقول ضلمه.. وعتمة ليل
وشوف عملنا .. كاااام قراقوش
يبدو لي ..
ان احنا فشوش
حاجه كده ..
زي الفنكوش
وف الاخلاق
بقينا اشلاء 
وصبحنا وباء
اتفشى فى جميع الارجاء
جايز نكون من ال عثمان ؟
وجايز .. ولاد مماليك ملاعين 
قطر و مشوه .. عالقضبان
ومالهوش دعوه ..
لا بالسايقين 
ولا مين .. راكبين
طب احنا مين !! و ولاد مين !!
ما احنا لا دول .. ولا من دول
احنا رقصنا .. زي البندول
يعني تاريخنا منا .. بريء 
زي بذور .. مالهاش محصول
يبدو لي .. 
ان احنا مغول .. ايوه مغول