يوم الحساب . ناخد الكتاب
إما لنعيم . إما لعذاب
وسؤال نبغى . لو يتلغى
مين فينا كان . كما ينبغى
جوارحنا . ولحد الكفين
هيشهدوا . ويقولوا آسفين 
أنطقنا الله . رب العالمين
ظلمنا مين . وإمته وفين
تقول خبيت . تقول غشيت 
تقول دخلت . حرام للبيت
تنطق عنيك . تشهد عليك
شافت حاجات . مكانتش ليك
تصحى الرجول . تنطق تقول
مشينا فى الحرام على طول
حتى اللسان . ينطق كمان
يقول شتمت . فلان وفلان
حتى الجلود . تصبح شهود 
تصحى اللى كان . واكلها الدود 
والحكم معجل . غير مؤجل 
وكل شيئ . مكتوب مسجل
آدى الحدود . وآدى الشهود
والقاضي رب . رحيم ودود
إما لنار . بتطق شرار
إما لجنه . نعيم وخلود