قطر الحياه مش موحد 
ربنا عمله كدا درجات 
لكل واحد مكان محدد 
مش بالعافيه ولا مزاجات 
فيه قاعدين هاديين نايمين 
وبيشكوا التكييف مش بارد
وفيه فوق منهم مسطحين
وبيشكوا م البرد الشارد
ناس مبسوطه ومروقه
باصه من الشباك بتشوف
ناس مزنوقه ومتزنقه
تعبانه وماليها الخوف
لو انتا قاطع درجه تالته 
متروحش ناحية البريمو 
لو شافوك داخلها فلته 
هيرجعوك على قديمو 
نازل الدنيا معاك تذكرتك 
متحدد فيها المكان بتاعك 
خليك فاكر ادينى فكرتك 
مفيش مكان غيرو هيساعك 
تروح يمين تروح شمال 
الكمسرى واقف هيشوفك 
متقوليش عندى آمال 
ولا تشرحلى إيه ظروفك
إسأل مين جابك وسابك 
هنا وقطعلك التذكره 
وتقدر تعرف من ثيابك 
حاجز قدام وللا ورا 
فى التكييف وللا السبنسه 
متقوليش بين البينين 
لو ضاعت تذكرتك انسى 
تبقى من ال متشردين