مش قولتلك ياامه
هعاود ومهسبكيش
مش قولتلك....
خليكى معايا شويه
ومتفوتنيش
مش قولتلك....
خليكى هناك وانا جاية
قولت جاية وجيت اانا
وملقتيكيش
قلت راح اعود من غربتى 
واقعد حداكى ..ومهسبكيش
عجلتى بدري بدري
ولميتى خلجاتك وطيرتى 
ومعاودتيش
لية ياامه؟؟
ليه طولتى الغياب
كان لسة بدرى ع الفراق
منتى عارفه يعنى ايه غربة 
ويعنى ايه مفارقة الاحباب
انا عند وعدى ..
وجيت لحدك لجل اعيش
لجل اعيش اللى باقي 
ف حضنك انتى 
واسيب ورايا
ناس غريبة ومهسبكيش
جيتلك انتى وبعترف
طولت شويه ف غربتى 
وغصب عنى لقيت نقرات
ف سكتي..
بقيت ازحها...
لجل اجيلك وارمي كل 
الموووت ورايا..ومعاكي اعيش
لقيت الموت ياامه محواطنى
من كل نحية وكل جيهة
وباينه عاشقنى..ومبينتهيش
مش هتيجى ..
مش هتيجى يعنى واترمى فى حضنك
زى زمااان
طب ولما اشتاق ف يوم انى اضمك
اعمل ايه..اشتاااق كمااان
طب ولما احب ابكى وانهنه 
مين حيمسح يوم دموعي
ويقلق منامي م الفجرية
ويقولى قوميالفجر أذن..
قومي صلي يلا
اقول سبيني عايزة اناااام
يابت قومي..نهارنا رااح
مش سامعه يعنى ديكنا 
ع العشة صااااااح
قومي احمي الفرن 
واخبزي رغيفين سخنين 
وعلقى عالشاى كمانى
واعدليلنا كوباتين
وتقليه شويه 
وحطيله نعناع مرعرع 
فيه هناك عرقين
فاكرة يااما لما حطيتى 
حلة المحشي ع الكانونين
ورحتى نقلاهم على حلتين
قلتى حلة لينا وحلة لاخوكى 
اللى ف الديش
هوة والواقفين خدمة معاه ..
عبال امااغسله الهدمتين
يلا فزي يابت يلا
لسة هتبصيلي عاااد
قومي يلا واعمليلك همتين
كنتى لما تقولي كلمه يقفولك 
بدل الشنب شنبين
نفسي ياامه ترجعيلى
واعمل كل شئ عوزاه بهمة 
عارفه يامه لو قلتي ساعتها ..
لو قلتييييي...
لو قلتي اخبزيلنا
لاخبزلك بدل الرغيف... كيلتين
ولو طلبتى القمر نفسه
لاطلع واجيبلك من الهلال قمرين
بس ارجعيلى انتى وشوفي
هعمل ايه..
لجل اطل في عيونك
بس ياامه طلة 
لااااااااااااااا طلتين😪