عاتبت يوم الدنيا وعيونى بكت فيها. 
ورفعت ايدى للسماء وقولت انا ليها. ليه حياتى فيكى يادنيا بشوفها سكة سفر .
وذنوب لناس كتير أتمنى فى يوم تغتفر. 
عشت انا وشوفت فيكى كل ألوان الخطر. 
وشوفت كمان الصيف لما بينزل فيه المطر. 
شوفتك يادنيا وكأنك لينا قطر الحياة. مع انك يادنيا كل من ركب فيكى تاة. ليه بشوفك يادنيا كل يوم بشكل ولون. 
يوم اشوفك بكأس الغدر تسقى الكون. 
ويوم اشوفك والفرح فيكى مالوا عيون . 
عودى يادنيا لينا زى ماكنتى زمان. 
عودى وخلى قلوبنا تانى يملاها الأمان. 
ردت عليا الدنيا وقالت مالك يابنى البشر. 
دا انت اللى خليت الشر فى الكون انتشر. 
انت اللى نسيت ربنا وتجيب عليا اللوم. 
دانا زى ماانا عمرى مااتغيرت فى يوم.
انتم اللى ذنوبكم عند الحد زادت. 
انتم اللى عيونكم عن الحق حادت .
عودوا تعود من تانى الحياة ليكم. 
عودوا لكتاب الله هو اللى يحميكم.