الا أونا الا دوي الا تري
فتحنا المزاد يا بيه
والدفع مش فوري 
ممكن نقسط فيه 
هنبيع حبوب النفاق 
ونبيع حبوب الوفاء 
ونبيع حبوب الخداع
هنبيع حبوب الخيانه 
ونبيع حبوب الامانه 
ونبيع حبوب الوداع 
هنبيع حبوب الطيابة 
لكل الناس الغلابة 
بس برخص التراب
وياريت فيه حد ياخده
مهو اصل الكل عنده
وهو سبب العذاب
ويبدأ اول مزادنا 
بحبة حبوب وفاء
والله دا سعره فيه
ووداعاً للغلاء
طيب فيه حد شاري
او حتي ياخده بلاش
والعرض لسه ساري
حدي هيجي .. مجاش
الا أونا الا دوي الا تري
طب اهي حبوب النفاق
بس العدد محدود 
مع انها دي بلاء
وطريقها اخره سدود
سامع هناك 50 
هنا ع اليمين 70
و 80 و90 و100
واحده واحده انت وهي
قولت العدد محدود 
بشويش بقا عليا 
خلص النفاق في دقيقة
يا خسارة ما دي الحقيقة
بارت باقي الحبوب 
والعيشة بقيت غريقة
وبعنا حبوب الخيانه 
واهي ماتت الأمانة 
وبعنا حبة خداع 
علي شويه وداع
واللي اشتروا منهم 
كلاب وحبة ضباع
محنا في زمن غدار
فيه الفقير اهو جاع 
حتي الصديق اتباع 
اما الامين دا خلاص 
معتش منه وضاع 
فعلاً زمن العجايب
كل اللي فيه خداع