الواد دسوقي
مليه الحزن وفايض منه بزيادة
وكالعادة يا عيني بيعافر 
وبيداري وبيشرب قهوته ساده 
يا عيني عليك يا أبو دسوقي 
يا جبروتك وقسوة قلبك 
يا طول بالك وقوة صبرك 
علي جراحك يا درش وهمك 
يا شايل الهم من يومك 
وكل الخلق بتلومك علي طبعك 
يا شارب م العذاب ألوان 
وفي الدُنيا ملكش مكان 
يا عايش في الحياة تراحيل 
يا مسافر بلا عنوان 
يا أبو دسوقي 
يا عايش بس من بره 
ومن جوه ميت يجي 100مره 
ومفيش مره طلعلك صوت 
منين جبت دي القوة
ومنين جبت ده الجبروت 
كأنك من صخور وحديد 
مهما الدُنيا فيك تظلم 
ومهما عليك تكون قاسيه 
ما بتنخش بتتحمل ما تتكلمش 
ويوم ما بتيجي تتكلم 
بتتكلم مع نفسك
وتتكلم كلام في سكوت 
عشان غيرك ما يتألمش علي ألمك 
وتشوف في عيونه 
نظرة عطف علي حالك 
يا واد مالك يا واد مالك
ومال الحزن؟؟؟ 
سيب الحزن وعيش 
سنك وعيش وقتك 
يا واد مالك ومال الحزن 
سيب الحزن؟؟؟ 
ده حتي الحزن 
مش لونك ومش كارك 
يا واد مالك يا أبو دسوقي 
يا أبو دسوقي 
يا واخد الدُنيا دي بصدرك 
ولا همك وفيها طافح الكوته 
ومهما الخلق فيك تنصح 
ياواد حافظ على نفسك 
يكون ردك 
وإيه الدُنيا غير موته 
يا شايل الدنيا فوق راسك 
ولافِف بيها 100لفه 
يا عريس ميت في يوم فرحُه
وكان دفنه وكان زفه 
وكان الدمع م الفرحة 
بحار تجري بدون مجرى 
يا عايش دُنيتك هجرة 
وما هجرتش في يوم حُزنك 
يا ظالم ب القوي نفسك 
وإيه ذنبك يا أبو دسوقي
يا أبو دسوقي 
يا واخد في الجراح نياشين 
يا كاتب في العذاب دواوين 
يا ناسي الضحكة والفرحة 
وبتغزل م الهموم فرحة 
وتهديها لكل الناس 
يا وحداني يا وحداني 
وشِعرك نُصك التاني 
والله إنت نُصك المجنون 
وشِعرك نُصك العاقل 
لكن مدفون 
ما بين قلبك وتفكيرك 
بيطلع ع السطور 
ينشف ويتعذب وياويلك 
لا بتنافق ولا بتكدب 
وتملي في خلق 
كرهينك لصراحتك 
وبيقولوا يا وقاحتك 
وقلة أدبك الزايد 
ومش زايد يا واد غير صبرك 
يا أبو دسوقي
يا واد اصبر شوية كمان 
وخلي الصبر بزيادة 
أديني صابر 
وأدني صابر على المكتوب 
كما أيوب ما كان صابر على مرضُه 
وإيه كان غرضُه من صبرُه ؟؟؟
غير إنه ينال رضا ربه 
يا ربِ رضاك والجنة 
وعلي ذكرٍكَ إلهي أعِنا 
يا رب الستر والصحة
وراحة البال 
وطول البال وصبر جميل 
على الدُنيا و ع الأحمال 
وموتة تليق برؤياك 
يا رب معاك أنا بقلبي 
وكُل جوارحي وما أنكرشِ 
إن أنا بعصاك لكن عشمان 
أنال قطرة في بحر رضاك تنجيني 
يا رب إرحمني واحميني 
من نفسي ومن غيري 
ومن دُنيا أخرها زوال 
يا رب إخرجنا منها بخير 
لا ظالمين فيها أنفُسنا 
ولا ظالمين فيها حتي الغير 
يا رب بجد أنا حيران 
ما بين الذنب والغفران 
وبين التوبة والعصيان 
وبين العدل والرحمة 
يا رب إرحمني يا رحمن 
ده أنا إنسان ضعيف جداً 
وتايه مني في الزحمة 
ما بين الدُنيا والآخرة 
ومتشعلق في حبل رضاك
ف اهديني لسبيل الرُشد 
وابعدني عن سبيل الغي 
وقويني ما تضعفنيش 
ده أنا غيرك يا ربِ ما ليش 
ف ماتسبنيش لكلاب السكك 
تنهش في لحمي الحي 
ده أنا غيرك يا ربِ ما ليش 
ماتهملنيش وسامحني 
على عُمري اللي فات مني
وصبرني على عُمري يا رب الجي