سيبنى اشم على ضهر إيدى 
واعرف اللى جاى ياسيدى
واحنا كدا وبنقول ياباى
أمال الجاى هيكون ازاى
حبه حبه بننسى المحبه
والمصلحه هيا اللى غالبه
وعلى المشاعر والحنين
داست برجليها السنين
ولا عاد حسن ولا نعيمه
وسميناهم شغل سيما
سهران لوحدى دليلى احتار
وفريد وعزفه ع الأوتار
فايزه ونجاة وعبد الحليم
يوسف السباعى والحكيم
بدايه ونهايه دعاء الكروان
الله يرحم روايات زمان 
آه يا حنينى للى فات
ياقلب مليان زكريات
يا مشاعر من جوا النفوس
سحقتها وكلتها الفلوس
شباب بيتجوز يومين 
ويطلق قبل الأربعين
بينتجوا بشكل متسارع
أطفال مشرده ف الشوارع
قسوة قلوب نكسب يدوب 
فى السكه ضلمه كل الدروب 
بالدمع باكى على حس راقى 
قولى يادنيا إيه جاى وراكى 
سيبنى اشم على ضهر إيدى 
واعرف اللى جاى ياسيدى