الست حرمنا المصون 
أم احمد وابننا حسون
وسكينه وحبيبتى فؤاده
سلاماتى وحبى كالعاده
أما بعد وما تلاه
بكتبلك من أرض الله
بعد التحيه والسلامات
برسلك تلك الكلمات
أعرفكم إن آنى بخير
ولا ينقصنى أبدا غير
العوده إليكوا ولقياكوا 
والعيشه وسطيكوا وياكوا
ساكت والقلب بيتكلم 
من نار الغربه بيتألم
أنا شوقى ملهوشى حدود 
والحيل م الغربه مهدود
وأعرفكم مابين الأسطر 
شوقى لعيونكم متسطر
بشرح ألمى بدمع العين 
ع الغربه بنقول يا معين
الحر نار .. صخر وجبال
واللا ماكان كلدا ع البال
مكتوب ومسطر ع الجبين
زى النار دى ماشافت عين 
يا صابحه بوسيلى لولاد 
كفيهم م الخير والزاد
هاتى للبت فؤاده فستان
وسيبيها تختار للوان
وسكينه حبيبتى متنسيش 
كات عاوزه فستان كرانيش
وحسن واحمد ربنا حارس 
هاتيلهم شنط المدارس
باعتلك كل اللى انا عامله
والمبلغ مرسل مع حامله
وأعرفكم إنى قادم 
فى أجازه فى العام القادم
من زوجك عبد الستار
فى خمسه مارس آذار