قاعده فوسط عيالها سكينه 
بتدبر فى الحال .. مسكينه
والحال وياها مش متظبط
سمعت باب الدار بيخبط
شوفى ياما مين ع الباب
يمكن حد من الأحباب
جارتنا ام احمد كتر خيرها 
والنبى منى عارفه أسايرها
شوفوا ياولاد باعتالكم إيه
طبقين محشى ولحمه عليه
حاسه بحالى ربنا يديها
أكتر ما بتعطى يعطيها
لسا فيكى يا دنيا خير 
وناس بتحس بحال الغير
والنبى كنت جعانه ياما 
صحى اخواتك واقعدوا لمه
ناموا يا حبايبى متعشوش 
دوروا فى المطبخ ملقوش
إصحى يانوسه وانتا ياعادل
دا فرجها ربكم العادل
فيه ناس متعوده متاكلش 
لو جارهم محتاج ومقالش