أنا عايش حياتي منبوذ 
بمزاجي مش خوف من الناس 
لنا ناقم .. ولا كمان مفروس 
أنا ممكن أكون متغاظ ...
من ناس بقت متاريس 
داخل دنيا كلها كوابيس ..
ووقاحة تخض الناس 
شوف ياصحبي الكلام بفلوس 
والضحكة بقت بقشيش 
والرقص بقا زفه وعريس 
ياإما تشوف الترقيص 
بأنواعة اللي كلها تهييس 
الناس قلبتها وشوش 
قدامك أحضان وبوس 
وف ضهرك سكين مغروس 
بقت كارثة بكل المقاييس 
زمان قالوا أصلها توريث 
وناس راكبين فوق ناس 
وخالت ودخلت ف الراس 
وأتاريها حجة متاعيس 
دلوقتي .. غالبية الناس 
بشوفهم نحل وناموس 
بيقرص حوش ياحواش 
ضمايرهم هبش وتهبيش 
والوازع خلص ومفيش 
خلوني .. زي الملبوس 
رجع بيتي بسرعة وتعيس 
فاقد نفسي وفاقد الأحساس 
الدنيا خرابتها خلاص
وأعلنت على الملاء الأفلاس 
لتبكينا وتبكي الأوباش 
اللي مارحموا واحد من الناس ..
عشنا في دنيتنا تروس 
بدون لقمة ولا حتى غاموس 
وثروتنا كلمة أخلاص 
وخرجنا عرايا بلابيص ......
أنا عايش حياتي منبوذ 
بمزاجي مش خوف الناس 
لنا ناقم .. ولا كمان مفروس 
أنا ممكن أكون متغاظ