الواد طيب يامو لواحظ 
وامو لابتهش ولا بتنش 
الصبح موظف وملاحظ
وبعد الضهر قاعد ع الفرش
ولا قهوه ياختى ولا سجاره
وابوه غلبان منتى عارفاه 
وسيرتهم حلوه فى الحاره
سنتين عيان والرب شفاه
والنبى نفسى ياست ام احمد
والبت سخامه تقول لأه
لو واحده مكانها كانت تحمد
ربنا وكفايه عندو الشقه
وغلبت معاها آنى وابوها
يخربيت عقل اللى جابوها
نفسى أجوزها بقى وارتاح
وكفايه عليا البت صباح
والنبى ياحبيبتى عاوزين هم 
والرجل رزقو على قده
ولا واحده تخلى عندها دم 
وتقول دا أبويا وتساعده
والواد محمود سابنا وهاجر
معرفش صحيح وللا وشايه
آل إيه ف الأردن بيتاجر
ولا شايفين منو قشايه
طيب ياحبيبتى أنا ماشيه 
وهعدى عليكى تانى قريب
تكون الحاله بقت آشيه
وربنا يعمل الطيب