حلوه يا صحبة الاحباب
صحتين ياولاد وعافيه
فارشين إياس قدام الباب
وبيضحكوا والنيه صافيه
ونسمة الصيف فى الليالى
والشاى جاى على الصينيه
عمى وخالى قاعدين قبالى
بيحكوا ويا تيته هنيه
والمساند جنب الجدار 
ساندين ورجولنا متمدده
مهما يكون الجو نار
نسيمنا بحرى مفيش كده
إنده لبوك ياواد يا فتحى
قولو كلم عمى ضاحى
ونادى كمان على عمك محيى
شوفو أن كان لسا صاحى
إندهلهم ياواد يا حسين 
ييجوا يقعدوا معانا ف الطراوه
أقعد ساكت ياواد يا ياسين
بس يا ناعسه بلاش شقاوه
قومى يا زبيده هاتيلنا العشا
جبنه قريش ومشنة عيش
روحى ساعديها يابت يا رشا
إجرى يا بت متكسليش
يتكلموا فحكايات كتير 
واللى الهوا لطشه ينام
محلاكى يا قعدة حصير
رسمتهالكوا هنا بالكلام