انا لما شوفت عنيك لقيت 
جواها طير فارد جناحه
نفسه يطير لكن اسير
تايه في ليله وفي صباحه
الطير جميل شكله اصيل
بس الدموع بتزيد جراحه 
ولما سمعت ضحكتك 
وشوفت ابتسامتك ع الخدود
عرفت ان فرحتك مكسوره
متحاوطه بحدود
متلونه بحبة دموع
مقهوره من وجع الحجود
ممنوع تروحي ممنوع تقولي
ومبني حواليكي السدود
والمشكله ان اللي ظالم
واللي جارح والاناني
واللي عمره ما حس حد
واللي في حياته اناني 
عايش حياته ودنيته
وكل يوم مع حد تاني
اه م الوجع لما يخلي
طير جميل مكسوره نفسه
احساسه اصبح كله ويل
ولا حد حاسه
مداري اهاته ودمعته
مش لاقي نفسه
عيني عليكي والف اه
امتي تدوقي طعم الحياه
انا لو بأيدي افرحك
مقولش لا 
انا نفسي بس 
تنسي الوجع
تنسي الهموم
وصدقيني كل شي 
ولا راح يدوم
بس انتي حاولي تفرحي
وبلاش تداري 
كل وجعك في العيون
فضحاكي عينك 
مهو جوه عينك باينه الهموم