نفسى أضحك 
ضحك صافى 
زى الأولاد الصغار 
نفسى أجرى 
ع الشط حافى 
وابنى بعيد للحب دار 
واصالح بينى وبين نفسى
وانسى أيام الخصام 
وانسى همى 
وانسى يأسى
وافرش على الرمله وانام 
بتمنى يبقالى جناحين 
أطير واحلق ف الفضا
محسش انى حر وسجين
والدنيا فوشى مسددا
عاوز فرحه من أى نوع 
وكفايه عشت كتير بآسى 
حد يمسحلى الدموع 
واشيل جميله على راسى 
حد يشغل نفسه بيه 
أو حتى أشغل نفسى بيه 
أحس بيه خايف عليه 
وانا كمان اخاف عليه 
تفتكر ممكن دا يحصل 
عن قريب وللا بعيد
وللا مش ممكن راح اوصل
وارجع أعيدو من جديد