قولت كتير وكتبت كتير
وتعبت سنين من التفكير
واللي تعبني وجنن عقلي
وزود ألمي جوه ف قلبي
لما بشوف جعان مسكين
والمستهلك ياعيني عليه
محدش ابداً حاسس بيه
حاله اتغير من غير دستور
وجاله يوم مبقاش مستور
ومحدش شايف ليه تسعيره 
رقابه عيونها دايماً نايمه
مدام بالمال جيوبهم عايمه
واحنا غلابه عايشين في ندمانه 
نفوس طماعه بكل بجاحه
والأسعار سكين دباحه
ناهبين خيرنا وخير بلدنا
واكلين قوتنا وقوت عيالنا
وحارمينا ناكل لقمه طريه
وحوش سعرانه في الأسعار
طالعين نازلين زي المنشار
دول عايزين تسعيره جبريه
ضربتها شديده ضربتها قويه
ده حتي الفول والطعميه
غلوها علينا ومش لاقينها
وخلوا بطونا كتير مشتاقه 
لفرخه في ايد ناس طماعه
خلوا الفرخه بميت لحلوح
وقلوب الناس مليانه جروح
وخلوا اللحمه تزور أحلامنا
ونغنيلها تعالي اشتاقنا 
وان فكرت وروحت السوق
تلقي كتير هناك حراميه 
يوم والتاني راحت الماهيه 
وخلي بالك من عصابات
بعربيه كارو ومعاها حمار
تشتري منهم تعود ندمان
الكيلوا هناك مش كيلوا تمام 
وحراميه كمان في الميزان
خلونا عايشين في دنيا غابه
مليانه وحوش مليانه ديابه
وجابوا للناس ياعيني كآبه
واحنا فيكي يادنيآ غلابه
أزمتنا ياناس ضمير ونفوس 
ووحوش بتهبش أي فلوس
ومهما الخير في بلدنا كان
ومفيش رقابه قول ياسلام
والفلاح مظلوم غلبان
يتعب ويجني آخر العام
ولمآ يبيع يجيلوا طماع 
ياخد منه الكيلوا بجنيه
ويزود خمسه علينا بإيديه
ورغيف العيش هو كمان 
رغيف عدمان مش زي زمان
كله بيسرق كله بينهب 
والحراميه في كل مكان
نفوس تعبانه ضمير معدوم
ونفسي مفتش يفوت كام يوم
واشوفه بعيني وهو معانا
ويبقي عنينا مايبقي علينا