ياجامعه الورد / ليه وردك ملان اشواك
وليه تحرمنى من عطرك / وتهجرنى عشان باهواك
أريج الشهد من فمك / وبستان زهر فى دُنياك
ده يوم السعد يوم قطفك / وكل الفرح فى لُقياك
جنيتى الُفُل والنرجس / وزهر الحب ليه ذبلان
بعطرك قلبى يتونس / ولاعمره يبات زعلان
اشوف خجلك على خدودك / كروعه شمس فى كسوفها
ورود تطرح على عودك / نغم سارى فى معزوفها
عشقت الدُنيا فى وجودك / بلون الورد انا باشوفها
أخاف يوم الحصاد تهرب / وأتوه بين الورود وأسرح
واخاف م الشوك على ايدك / تُدمى ايديكى او تجرح
ولو فات الربيع ببهاه / بباقه ورد راح أفرح
أشوف وردك وأقول الله / وقلبى بالغرام يطرح