الناس تهواك كتاب مفتوح 
واضح زى نور الشمس 
إنسان طيب خفيف الروح 
مش متسحب زى النمس 
ميحبوش ألغاز وطلاسم 
وكلام غامض مش مفهوم 
الضحكه على وشك راسم 
ومن جواك حقد ومكتوم 
ولا تعمل طيب وترائى 
ولا تلبس توب مش توبك 
لو مش مقدر فيا ذكائى 
الناس كلها فاهمه عيوبك 
وحياتك الدنيا منفاته
مش محتاجه لف ودوران 
ولا مستاهله ياعم غتاته 
ولا كلمه زياده نقولها كمان 
خليك ويا العالم دوغرى
كون انته إنته زى منته 
لا تحلى بضاعتك ولا تغرى 
ولا تزود على نفسك حته
الناس هتحبك على حالك
فقرك مش عيب وغناك مش ميزه 
وصراحتك أجمل من مالك
ياما ناس محبوبه معهاشى بريزه