فيه قراقيش وللا مفيش 

قوللى يا عم ومتخبيش 
أم حماده لاويه بوزها
قاعده بتتخانق مع جوزها 
الست عاوزه ألف جنيه
وبقالها ساعه تحايل فيه
تعمل كحك معاه بسكوت
والبيه اتكلم بعد سكوت
نطق السنادى عبد الهادى 
لحد الآن انا قاعد هادى
خلى الشر يا سوسو بعيد
وبلاش سيرة كحك العيد
وابعدى دلوقتى عن وشى
وللا هاتيلك لقمه اتعشى
شايفانى راجع شايل الهم 
متخلى عندك حبة دم
ألف جنيه من فين ياحبيبتى
شكلك كدا ياختى اتجننتى
إسكتى حبه اعملى معروف
منتى معاكى كل المصروف
عدى نهارك بقى واتلمى 
وللا هجيبلك من عند امى
كحك العيد دا كان زمان 
من أيام كان ياما كان
دقيق وسمسم وسمن بلدى 
أسكتى خلى نهارك يعدى
فيه قراقيش وللا مفيش 
قوللى ياعم ومتخبيش