إيدك من جيبى يا حبيبى 
وللا انتا حلالك تقليبى
شيل إيدك بس متتكش
أنا حاسس إنى بتفتش
ليه حل المشكله ويايه 
مزنوق تاخد م اللى معايه
شهر بيعدى ورا التانى
وإيه ع الغلب اللى رمانى
حواليك جيوبهم مكتظه
وقلوبهم مليانه غلظه
روح للغنى وسيب الفقير
هتلاقى معاه المال كتير 
سيب شبرا واطلع ع الجونه 
خلى قراراتك موزونه
شقق .. فلات .. عربيات 
شوف مين معاه وقولو هات
سيبك من أهل المدمس 
وناس فى اللقمه بتخمس
وللا عشان محنا غلابه 
ما تخلى فى جيوبنا هبابه
خف علينا ينوبك ثواب 
روح الفقير واقفه ع الباب
يدوبك همسه وهتطلع
بص انتا بعينك واتطلع
أما صحيح دى حاجه جنان 
بقى يصرف ع السليم عيان 
بقى دا كلام والله حرام 
مساكين بيزكوا ع الأعيان