أنا حامد .. وانا شاكر 
وباقى الإسم مش فاكر
ظروفى صعبه والكعبه 
وفى كتاب الحياه مذاكر
أيفت الدنيا على مقاسى
وشيلت الهم من راسى
بضحك ع الدنيا واخمها 
والعن لها .. أبو أمها
وبعيش بطاقه إيجابيه 
لو قلعونى الجلابيه 
لا بفكر ولا بشغل بالى
وبشوف الأسوأ من حالى
وافتح شباكى للهوا 
بلا عيا .. بلا دوا
أعيش الحياه والهم انساه
صبح النهار بيجر مساه
إمشى معايه كدا وتابع 
اليوم بيعدى مش راجع
إلحق إمسك أظبط هات 
العمر عدى منا وفات
لو كنت صحيح واد فتك 
إخطف م الدنيا فرحتك
لو صادفك اليوم الكالح 
مثل دور الرجل الصالح
أنا حامد .. وانا شاكر 
وباقى الإسم مش فاكر