إكتب ياعم شعر وغناوى 

شبابنا قاعد ع القهاوى 
والوقت عندو لا يساوى 
فى كل شارع وكل حاره 
شباب تشوفو يا ألف خساره
مجعوص وماسك السيجاره 
ويشتكى مر الشكاوى
فين الكفاح فين المحاوله
إزاى هتنهض بينا دوله 
وشبابنا بيلعب دومنو وطاوله
أما الشغل مهواش غاوى
يحكى ويرغى فى الأسرار
ويحرق قرشو زى النار 
ويفتح كرشو هناك فى الدار
شباب مريض ملهوش مداوى 
تمشى تلاقى يمين وشمال 
ناس بتنادى طالبين عمال
وفأى مكان هتلاقى مجال
بس أخينا مهواش ناوى
لسانو شاطر فى الكلام
للفجر يسهر ثم ينام
ويقول اهى عيشه والسلام
صحينى العصر يامستكاوى
ويقوم م النوم عامل عيان
سايق العبط ويا الجنان
ويشتكى ويعمل غلبان 
وعندو صحة حمار حصاوى
هات شيشه يابنى وهات حجرين 
وخمسه شاى لصحابى لتنين 
يبقى الحساب خمسه وستين
إجمع بقى واكتب يساوى
تلات ساعات يعدل فشعره
إوعى فى الكلام تجره 
ربك ياشيخ يكفينا شره 
سيبو ليعمل علينا حاوى
سقفه للشاب الشغال
واللى فتح قدامو مجال 
وجنودنا ع الجبهه الأبطال
أما الباقى شوية بلاوى
إللى قاعدين ع القهاوى