الكلام مطلوب
لما تتوه عن الحل الحلول
والحكى تنفيس
حتى لو كان مامنوش مأمول
الكلام متاح
قول اللى جواك بالعرض والطول
واوعاك فى قولك
تقرب من الحدود والجدود والاصول
الاصول عرض موروث
والخوض فى المأثور عمل مخلول
مالك بابوبه وجدك
ان كان ماشى بالحكمة او مخبول
او كان مثال للامانة
او كان شيخ منصر داير يصول
تاريخ اندفن من زمن
والعبرة فى بكرة وايه منه تنول
انا عالم فى مجالى
وانت عطلان حالك زى المشلول
وابويا كان اجير
فى وسية جدك ومعاه عمال فلول
انا بالخير ذاكر
تاريخ الخلق وصاين العظم المنخول
وانت عريان المخ
ولسانك على الحى والميت بيطول
هاتوا ميزان ربانى
يوزن العمايل والعلايل وكمان القول
هتلاقى فى وشك سواد
اتولد من هباب هابب من قلب مغلول
هاقولك الخلاصة
اللى مامنها مناصة ولينفعها معسول
الرجولة عند الرجال
ادمان وكيف مامنوش ابدا فلول
مش وراثة
زى الفدادين وزى العرض المسلول
الراجل هو اللى اتربى
على طبلية ابوه ولو كان اكله فول