حبيتك ولونك قاسى
وعوازلى حاسدنى عليك
وأسأل عنك تعمل ناسى 
والاقيهم قاعدين حواليك
وأرجع وانا دمعى على خدى
وتقول غلطه واسيبها تعدى
وتجيبنى الأفكار وتودى 
واسهر ليلى أفكر فيك
وامشى لوحدى وانا حيرانه 
واسمع بيقولوا غيرانه
من حبك ياما شفت مهانه
تخاصمنى وتغضب واراضيك
آه من حبك آه م الغيره
دا يوماتى مخلينى فحيره
والقلب تملى ملوش سيره
غير انه بيسألنى عليك
عقلى يقولى يابت انسيه
حبك ليه دا اللى مقسيه
واحتار . قلبى مين يواسيه
عمره متعود يجافيك
اللى فاكرهم بيحبوك
على هجرى تملى يزقوك
بكرا يا قلبى راح ينسيوك
وترجعلى ودمعك فعنيك
مش هستنى ولا هتمنى 
ولا هبقى فنار وأقول جنه
لو حتى على إيدى الحنه
همشى واقول ربنا يهديك