تعمل ايه لو شفت راجل
بيفرق ع الناس فلوس
تقول عندى مشوار وعاجل 
وللا ف وسط الزحمه تدوس
وللا تقف حبه وهتمشى
قول الحقيقه كدا متخافشى
لو شوفتك هعمل معرفشى
بحكى معاك كدا بالمحسوس
لو طالعين شله م الجامع 
والفوضى قامت فى الشارع
كام واحد منهم هيمانع
وكام واحد منهم هيجوس
ليه لما نلاقى السلب متاح 
والدنيا حالها سداح فمداح 
نتخلى عن كل صلاح 
ويتحول أغلبنا لصوص
إسأل نفسك كدا بصراحه
لما تكون السرقه متاحه 
هل هتكون راضيه ومرتاحه
يخرب بيت طمع النفوس
عينى ع اللى شايف صورته 
وعلامة الصلا لاطعه فقورته
موقفو إيه بين أهلو وعيلته
إياك ميكونشى محبوس
مشهد عمرى م يوم انساه 
واحد كنت بصلى وراه 
شايل كرتونه على قفاه 
وبيجرى ووشو مدفوس
ليه واحنا قدام الناس 
نظهر ببراءه وإحساس
ع الوش طيبه وإخلاص 
ومن تحته ماسكين الموس