أصوات نسمعها فى الشارع 
إوعى تقول انك مش سامع 
محمود بيسلم على مختار
بيقولو مالك كدا محتار 
عباس بيقول واقف مستنى
حد احكى وياه من سنى
وسلامه بيفتح باب الورشه
وأم حسين فرشت بالكرشه
حاسب كدا عفرت الفرش
إكنس يابنى ومتعفرش
رش شوية ميه الأول 
نهارك شكلو كدا هيطول 
تلاته بعشره جنيه يا قوطه 
عبده الحلاق بينفض فوطه 
فوقيه بتسال ع الجمعيه 
قوليلها دورك المره الجايه 
بتقول إيه يأسى عبد العال 
والله الراجل دا شغال 
بقولك إيه بلاش غلاسه 
وبلاش نتكلم فى السياسه
أمك فين يابت يا زينه 
خدت أبويا وراحوا الجنينه 
رايح فين يا معلم نصر 
هقعد فى الجامع استنى العصر 
إدعيلنا معاك الله يخليك 
حاضر ياخويا ربنا يشفيك
أمى بتقولك هات باكو شاى
وحسابو هتاخدو الشهر الجاى 
أمك يا حماده مش مظبوطه 
ومعدناش بنبيع ع النوته
كلو عند الله متقيد
بكام الفراخ يا معلم سيد
مالك ياواد ياحسين مدايق
قايم م النوم وشك مش رايق
درسى بيوجعنى وعاوز اخلعه
طب خد سبت الخضار طلعه
إيه الزعيق دا ياواد ياحماصه 
إتنين واختلفوا فى السياسه
إسكت ياواد يابن الدايخه 
إرحمنا بقى م النكت البايخه