هات واحد شاى وصلحه 
هاود الزبون وريحه 
وهاتلوا شيشه معاها حجرين 
كان غايب عنا بقالو يومين
واتنين كمان على ميه بيضه 
وهات ترابيزه تانيه عريضه
طاوله ياعبده وزهر نضيف 
إللى يلاعبنى يكون حريف
شيل الطاوله وهاتلنا دومنو 
الحلو يغير م الأحلا منو
مين مع مين ماتش النهارده 
شفت الكوره بتاعت العارضه
روق دمك يا مستكاوى 
واشرب سحلب ان كنت غاوى
هات قهوه زياده وواحد لمون
عمر العشره ياواد متهون
البت دى مزه قوى يا حسين 
ياترى بتعدى تروح على فين
مالك زعلان يابو محمود
إضحك خلى الفرحه تعود
يخرب بيت المزاج وأبوه 
حتى المعسل بيغلوه
حاجه لله والنبى يا أخينا 
إدعيلنا معاك ربنا يهدينا 
مالك ياسطى قاعد حاير 
بيقولوا هيغلوا السجاير 
لو أى جنيه تانى هيجيلها
ورحمة أمى دا هينيلها 
ياحكومه متحنى على الغلبان
دا نص فلوسه على الدخان
قول للزبون دا خلاص شطبنا 
خليه يقوم يللا يحاسبنا
الفجر هيدن يللا ننام 
يارب زقه بقى لقدام