كلاب سكك بتنهش لحم
وغدر وفوضه وخيانه
وقطيعة لصله الرحم
وكروش مليها التخمه
بتوصف صوم
لبطون خاويه وجعانه
وعقول في غفله ليل
وبقشيش لجل العيش
وقهوه ماليها الهيل
وكأس لعرق البلح
زرعتك انا سكر وورد
صبارك أنت طرح
وصويت وطبل وزمر
وحزن. وفرح
وحمول تهد الحيل
وفاس مكسور
والتور يلف يدور
أبو العيال معزور
مسجد بدون محراب
ونصلي ع الشهدا
وأرض نشفانه وعطشانه
100 أيد تنهب ف دكانه
صياد يلم الطرح
والجرح يفتح جرح
خاليه الشباك 
يا مه
ومنين نجيب الطفح
النورج بقا مهجور
سنين بيستنا
موسم حصاد القمح
طرح الغيطان كداب
وأتفرقوا الأحباب 
والغربه بتعلم 
عربي وتاريخ وحساب
في سكه الفوضي
أفلاطون 
لا بيكتب ولا بيقرأ
ودنّ نحاس 
معروض للبيع
طبيخه كان للحضره
من قعر قعر البيت
ماتت البقره
بس الحمار هيعيش
وأتلموا مريديني
وانا شغلتي درويش
انا اللي وحدي عانيت
وف بردي ما تغطيت
أخدوا الحرام مني
وانا اصغر اخواتي
وأحزاني غنيتها
أمي وبتصلي 
من غير مصليه
الارض فارشتها
وأزاي نلوم ع الناس
والناس. مش هيه
رحلوا اللي كانوا زمان
بيمسحوا دموعنا
وشالوا معانه الهم
وفضيت ديارهم
حواليه كل الناس
وغابوا حبايبنا
وفضلت أحزانهم