ماتفكريش تسيبينى
إنتى عمرى وسنينى
وحبى ونور عينى
وأحلامى وحنينى
*******
لا عمرى كنت غدار
ولا قاسى
حبك حبيبتى على عينى
وفوق راسى
وان كان ع الوجع
أنا اللى بآسى
ولو بإيدى أحسبلك
عدد دقات قلبى وأنفاسى
ومين غيرك أفكر فيه
مهما كنت ناسى؟!
*****
وانا عارف كلامك دا
مش من قلبك
واعرف إن الحب أكبر
منى ومنك
وان صادف يوم 
شغلتنى الدنيا عنك
نادانى قلبى وقالى
حاسب ليضيع منك حبك
*****
أنا لا عمرى كنت قاسى
ولا يوم جرحتك
ولا مرة نسيتك
ولا فى يوم نكرتك
ولا لحظة دعيت عليكى
ولا ليلى ونهارى هجرتك
ومين يواسينى غيرك
ولاقى فين زى حبك ؟! 
*****
ومين قال حبك عليا هان
وازاى تقولى غيرنى الزمان
لا عمرى عليكى كنت قاسى
ولو قسيت باعترفلك
إنى ندمان
وكفايا سهر الليالى
سهد وهجر وحرمان
*****
وأيامنا الحلوة الجميلة
عشناها ولا ألف ليله
ونظرة من عنيكى الكحيلة
تحكى قصة غرامى الطويلة
*****
وانا عمرى مانسيتك
وف كل لحظة بقولك إنى حبيتك
وازاى أضيع عمرى وانا
كلى ملك ليكى
وبدمى وروحى ياحياتى أفديكى
*****
وحاسيبك للزمن تجربى غيرى
ومسيرك يوم 
ترجعى لعشك ياطيرى
ولازم تعرفى إن قلبك أسيرى
الحب عليه سجان
ومعاه قلبى وضميرى
*****
وبلاش تقولى نفضها سيرة
وكفايا الناى الحزين
زود فيا نار الغيرة
وكنت فاكر إنى الأمير وانتى الأميرة
صبحت مش عارف مالى وعايش فى حيرة
*****
الحب الصادق عمره ماينتهى
دا كل يوم لما قلبى يدق
على قلبك وليكى يشتهى
وقلبى لو يوم منك زعل
ولو لقيتى أحسن منى
حبك عمره مايبعد عنى
واسألى قلبى حايقولك إنى
عمرى مايخيب فيكى ظنى
*****
ولو سافرت فين أروح؟!
ومين غيرى يداوى الجروح
واعتذرلك وبحبى أبوح
*****
انتى دنيتى وعمرى
وانتى الحياة والروح
واسألى ليلى
وساكنى مطروح