لو نفسك يوم تبكى شويه 
إنزل روح مصلحه حكوميه 
هتلاقى هناك متخصصين 
وأساتذه كمان فى الروتين
هيبهدلوك ويعقدوك 
ويطلعولك عين أبوك
الأستاذ دا لسا مجاش 
واللى جنبو متعشاش 
ودا قايم مضروب بالجزمه 
ومدام فايزه ملهاش لزمه 
ودا له بصه فيها معانى 
مد إديك واديلو من تانى
ودا لسا دلوقتى بيفطر 
ومزاجو ياولداه متعكر 
مش شايف الأكل أمامى 
غور يللا بقى من قدامى
علقلنا يا ابنى على الشاى 
إلأستاذ عبدو مهوش جاى 
فوت بكرا يمكن تلقاه
معرفشى كلو على الله
قوموا نصلى الضهر جماعه 
فيها إيه لو نصبر ساعه 
حسنه بناخدها من ربنا 
ولا بنصلى يوم غير هنا
ورئيس قسم التعقيدات 
بيوقف كل الطلبات
لو طلبك يوم يوصل عندو 
إوعى تزعلو وللا تعاندو 
ورقك مظبوط ميه الميه 
بلو بقى واشربو بالميه
ويوم متختم ختم النسر 
إرفع إيدك بعلامة النصر