إرحميني ياوليه أنا والعيال 
كان يوم اسود لمآ زاد السولار
والخيبه التقيله للدولار
علي طول معدتنا مولعه نار
وبقالنا كتير علي هذا الحال
مجنناني بطلباتك اليوميه
ولوطلبت باميه أو ملوخيه
الاقي الغدا فول أو طعميه
أو شوية بطاطس مقليه
ونتخانق يوماتي ع الطبليه
حرام عليكي يا مفتريه
بتاخدي فإيدك الماهيه
من الصراف زي ماهيه 
ومفيش يوم لقمه طريه
طب إعمليها ياستي مفاجئه
وخليها في الشهر مكافئه
لو حتي فرخه من الجمعيه
او طاجن لحمه بالباميه
او كل واحد سمكه مقليه
ارحمينا الله يخليكي شويه
ومتقوليش الماهيه مش مكفيه
دا هي كمان زادت يامفتريه
قالتلي طب إمسك انت المصروف
من خبتي قولتلها عملتي معروف
وحلمت ساعتها بلحم خروف
وأول مادخلت السوق برجليه
لقيتو مليان بالحراميه
الحاجه أم عشره لقيتها بميه
واسبوع واختفت الماهيه
وغرقت أنا في شبر ميه
ومكنش يخطر علي بالي
أظلم الغاليه ام عيالي
وهي متحمله ياما علشاني