أبويا..
مات جسد لكنه
عايش جوايا روح
كل ما ازعل اروح وأقوله
مين غيرك يرد الروح
كنت دايما فى المنام
تجيلى وترمى السلام
وتقولى إوعى يوم تنام
إلا وفرضك لربك تمام
فاكر يابا..
لما بصيتلى بصة سكوت
ولسان حالك بيقولى
النهاردة دنيا وبكرة موت
ما كنتش عارف فى الدنيا حاجة
رغم العلام حسيت إنى غشيم
راجل وزوج وأبو ولاد
لكنى فجأة بموتك
حسيت إنى يتيم
أيوه يتيم
مات الحكيم
اللى كل حاجة عنده
لا مشكلة
إيه المعضلة
بكرة تتحل المشكلة
وتيجى غيرها
وبرضه يابا تقولى
لامشكلة
طب ليه يابا بطلت تزورنى فى المنام
علشان بقيت قد عمرك
اتنين وسبعين سنة بالتمام
كفاية عليا كدة
لو ماجيتليش فى المنام
حا جيلك أنا..
بس وسع لى جنبك
فى مطرحك..
بكره..استنانى
انا جايلك قوام