ميلي يامايلة مع الأيام
بالذمة ياناس دا اسمه كلام
فين البنا وفين الحي
لما شيطانك يفضل حي
عمال تنهب رايح جاي
 والأرواح ما ف داهيه ياخَي
الله يخرب بيت دي عقول
في الكرش تعبي ولاعجول
نديها الفرصة وبنقول
ماله المالك أصبح غول
وإحنا مشاركينه بتطبيل
 والآخر دا لْطِيم وعويل
تتعالي على بيت ف ممر
أهي راحت تحويشة العمر
متلطم بين شقة وأوضه
وتعيش أيامك ب المر
كان فين عقلك يادي النايبه
 تتشعلق ف حبالة الدايبه
وبنرجع نصرخ ونولول
ياحكومة غِتِيني دا انا ف نايبه
وتِزْعَق زي غراب البين
أنا وعيالي هنروح فين
ونزود من الخيمة اتنين
لجل نلملم  وحل وطين
ياضماير ماتت من بدري
والله الهم علينا دا بدري
وبدال ما نعلّي ف أبراج
طب مانعمّر صحرا ونبني
مش ناقص غير ننهب روحنا
عريان بيكوا  وقال متغطي