جرا ايه يابلد الطيبين
دمعك ما بيفارق خدودك
والخوف بيرقص فوق حدودك
وال بيزين في عودك
ليل جبان ونهار حزين
 جرا ايه يابلد الطيبين
تملي ليه لبسه الحداد
والفرح فيكي بالميعاد
هو الغرور صاب الولاد
خلى القلوب متفرقين
 جرا ايه يابلد الطيبين
عمرك في يوم ماكنتي غابه
ولا وكر اجرام أو خرابه
ولا شفت فيكي دموع ضعيف
مظلوم بيبكي بكاء مخيف
ولا طفل تايه في الشوارع
ولا بنت ضيعه وشاب صايع
ولا شفت فيكي حد بايع
ضحكتك بسلف ودين
 جرا ايه يابلد الطيبين
من أمتى كان الغدر طبعك
والدم بيلوث صوبعك
والشر في عز النهار
واخد عباية الخير ستار
من امتى قولي وفهميني
قلبي حزين والخوف مليني
أرجوكي ردي وسميعني
القسوه دي جتلك منين
 جرا ايه يابلد الطيبين
ياام الولاد رمز الكفاح
من الفجر حي على الفلاح
من امتى كان شيل السلاح
فخر الايدين الشقينين
 جرا ايه يا بلد الطيبين
انا كنت بمشي في الظلام
من القنطره لجامع السلام
لكنت اخاف ولا كنت اشوف
منظر أليم مليان بخوف
وكل شارع أمشي فيه
القا الامان بالنور مليه
أتبدلت كل الصور
وكل يوم نسمع خبر
قتل وخراب وبلطجه
وحشيش وبنجو وعربده
ولا التراما والتمول
انواع كتير وتعبت اقول
ظهر الكسل ظهر الخمول
وخلاص بقينا مدمنين
 جرا ايه يا بلد الطيبين
صعبان عليا اكتب عيوبك
وبين سطوري اشوف دموعك
لكن سكاتي مش ف صلحك
ولا عمرو هيطيب في جرحك
انا من ترابك شب عودي
وابني وحفيدي ميراث جدودي
أزاي اشوف النار هتكلك
ومترميش وفحضني أخدك
وأنده على ولادك وأهلك
يكونو جنبك في المحن
ويشيلو لو مال الزمن
يا ولاد بلدنا يا كل دار
رجال شباب كبار صغار
بلدنا وقفه ف انتظار
تشوف ولادها المخلصين
علشنها دول مجمعين
بيرفعو شعار الاخوه
ويقولو للدنيا احنا مين
وتحيا بلد الطيبين