تركت بلد الحبايب / يمكن ع الغربه اقدر
سافرت والفكر غايب / ودموع العين تمطر
والقلب ف حزنه دايب / حزين مهموم واكتر
لفيت كل الموانى / مش لاقى حضن دافى
وطوال الليل اعانى / ودموعى بين كفافى
ونسيت اسمى ومكانى / وهموم كسرت كتافى
فين الحبايب فين / حاسس انى شىء غريب
واشكى همومى لمين / وازاى جرحى يطيب
وقمرى فوقى حزين / بينادى على الحبيب
فكرت ارجع بلادى / واحضن ترابها الغالى
ارجع لمكان ميلادى / الغربه دى مش مجالى
صوت من بعيد ينادى / يامصر صورتك فى بالى 
وانتى الحياه والروح / مهما اتغرب راح  ارجع 
انا شفت الكون فى وضوح / لكن انتى يابلادى اروع
يامصر اشفى الجروح / ونادى لى قلبى هايسمع