من بين ضلوع الفلاحين
ومن خمايل غُصنها
جانا ولد قلبه حزين
أسمر فى لون طميها
بتحب فيه ويحبّها
كلّه أمل
يتمنى حِلم لو إكتمل
النبض نبض المتعبين
الحلم حلم الرائعين
والبسمة فوق الثغر شقّت نهر
مليان بالحنين
******
شايف زهورالتبر
من جوّه خيرالأرض طالعة منبتّة
وشاف شعاع الفجر شمس دافية متبتّة
وشاف دموع الحزن فى عيونِِ العذارى
وشاف دبول الحسن فى خدود الحيارى
وشاف أنين اللمعة من شمع صمم ينطفى
والإنكسار فى عيون صبيّة بيختفى
وشاف شِرار الجلادين متسلحين
وبصرخة بتهزّ الفضا
وشاف فى عين الفلاحين أحلام وحبّة فضفضة
وشاف جراح بتإن من كُتر الألم
وشاف خيانة كلمتين جريوا بأحزان القلم
وشاف حروفه بتتسرق والحلم هو اللى انظلم
وشاف عيون متنِكسة والحسرة بتلف العَلَم
******
وعيال ملاها الخوف وقسوة الانكسار
والشمس غابت ع النهار
والدم سايل فى القنا والترعة لوثّها الدمار
والبنت ناحت ع الولد والحزن هدّم كل دار
والرملة هاجت ع الشطوط
والبحر واقف بانبهار
أما الفتى ضاعت معالم كلمته ومحبّته وبسمته
من غير تردد واختيار
 من غير تردد واختيار