متخافوش أنا عنيد 
وراسى أنشف م الحديد 
متفكروش إنى ضعيف 
ولو على رقبتى سيف 
 ومهما تكسروا المآديف 
أنا عنيد وراح اعدى 
لما الموجه دى تهدى
أنا عنيد وشوفونى 
متقدروش تزلونى 
أنا عمرى معيش مزلول 
وياما ع الراس دقت طبول 
صحيح الشده بتبين 
مين اللى كان فيها حنين 
ومين جواه مش مظبوط 
بيستنالى لحظة سقوط 
مين اللى مد لى إيده 
ومين يوم شدتى عيده 
مين اللى ف كربى بيهلل 
مين اللى بيهرب ويتعلل
أنا عنيد عشان مصرى
ومكتوب فى السما نصرى 
مش بيكم ولا فلوسكم 
ولا تهليلكوا وكلامكم
ياما ضحيت لكوا بدمى 
وشيلت عشان إسمكم همى
دلوقت تجتمعوا عليا 
وانتوا ماكنتو غير بيا
بكره جاى عن قريب
ويبان العدو من الحبيب 
لكن متنسوش إنى عنيد 
وراسى أنشف م الحديد