مسافر فى الدرجه التالته 
والكرسى حديد من غير شلته
والشبابيك ثابته على حالها
لا بنفتحها ولا بنقفلها 
وناس غلابه كتير واقفين 
عيونهم ع القاعدين باصين
كل محطه بيركبوا ناس
دول عاوزين يوصلوا وخلاص
ومتعرفش فى الزحمه ازاى 
واحد معدى بيبيع شاى
واقف عند الباب كمسرى 
واحد شافه سابنا وجرى
باين عليه راكب تفليته 
وتشوفو عامل زى الحيطه
وخمس تقلام حبر بجنيه 
ياترى بيكتبوا وللا إيه 
كل حاجه هنا بتتباع 
إبر الخياطه والنعناع 
والسجاير والزراير 
مول بيلف علينا وداير
وولاعات ونضارات 
وواحد شحات بيقول هات 
ودا ماشى فى الزحمه ازاى
وكل شويه رايح جاى
وناس نايمين فوق الرف
وناس قاعدين هناك ع الحرف
ودا بيفكر فى همومه 
ودا لسا مصحاش من نومه
ودا بيزق ودا بيهق 
ودا واقف زهقان هيطق
ودا متخانق ويا مراته 
وقاعد يدعى على حماته
ودا بيحب فى التليفون 
ودا باين عليه مجنون
ودا بيحكى فى السياسه 
ودا وقعت شنطه على راسه 
وفى النهايه كله بينزل 
ويفكر فى هموم المنزل