دوى يا صرخة المظلوم 
صحى كل البشر م النوم
وحيد فى وسط الناس
بيملا بالحروف كراس
رفقاته ورقه وحبر وقلم
وحكايه عن بريئ اتظلم
بيرسم كتير ويشخبط 
على باب مقفول بيخبط
ويصرخ بصوت عالى 
يقول للصبر تعالالى 
مستنى حد يفتحله 
يقوله كلام ويشرحله 
والباب حديد ومتربس 
ورا منه حد متربص
حارس قاعد على كرسى 
بيعانى من مرض نفسى
أبكم أصم مبيسمعش 
لو اتكلم مبيجمعش
بقى حلمه يشوف الشمس
ويسمع كلام بشر لو همس
ويحكى ياما مع نفسه 
يتسلى شويه من نفسه 
يسأل كتير ويجاوب
ساعات ميكونش متجاوب 
سؤال ملقاش إجابه عليه 
هيا الجدران دى لونها إيه 
إزاى فى الضلمه هيحدد
سمرا وللا لونها اسود
ولسه فيه سؤال تانى 
غير السؤال الأولانى 
إزاى عليكى يا دنيا يهون 
ويعيش فيكى البريئ مسجون