حِكايتي مع الزمَان

أبدأ وأقول ب كان ياماكان

وضفيرتي تِجمَع الألوان

وبقلب مليان بالحنان

حضنت أيام الزمان

عدت سنين وكبرت فجأة

قابلت فيها وجوه حسان

وقلبي جنبي يختار بتؤده

لجل يصادفني في يوم إنسان

وف يوم لقيته في سكتي

وملامحه سِكنِت مهجتي

فكّرت حَــبَّه أميل إليه

قلت أسكتي والشوق داريه

لتدوقي عذاب عاشوه صحاب

أو تندمي لو رحتي لِيه

مرت ليالي كتييير سهاد

وأنا قلبي سايق في العناد

وفجــأة روحي اتشعلقِت

بحبــل خالي من الأوتاد

إديت بقلب من غير حساب

لا ف يوم شكيت ولاصدق غاب

كُـل اللي نابني سياط عذاب

والغدر جاني من الأحباب

والحب اللي كان فارشة جناين

أتاريه طلع وهــــم وسراب

ما صان لقلب وبقوة خان

والحب عَنده إتْهان وهان

وبكلمة من حرف اللسان

كل اللى هَمُّه جمع الحسان

وأهي واردة وبعروة جاكِته

عِدْلَـه مايلـه المُهم تِقْضـى

وإتساوا عنده كما الأوطان

قلت أشتِري روحي اللي باقيه

ودفنـت قلبي في كــوم تراب

خدت القرار

وقلت له

خليــك بعِندك ينفعك

وهْمَك مغارة بتخدعك

ولاعمري يوم أرجعـك

لقلبي تاني

إذا حتي يوم وصادفتني

وإن جت عنيك تضمني

عمر الغرام مايهزني

شوف حد تاني

قلبي اللي كان ملكك وليك

وباع زمانه ومشتريك

واللحظة عمر وعاشها ليك

مايحن تاني

توب الخداع أنا هـ أخلعه

خليه لغيـري هـ ينفعـــه

وتعيش له فتره وتخدعه

وبعد حَبَّه تودعُه

وتعيد زماني

سيب دنيتي و خليك بعيـد

يمكن ف يوم تعيش سعيد

وتلاقي حد بتوب جديد

يشبه خِداعك العتيد

خِلص الكلام من غير ملام

والدرس درس م الأيام

وقولت علي الحب السلام

ما ها عود له تاني

وخِلصت الحكايه