الدنيا عروسه نسبسبها
واللى بيكسبها اللى يسيبها
لا مشعبط فيها ولا يجرى عليها
ولا أصلو خاطبها ولا نسيبها
ميقدرهاش .. ميعبرهاش
ولا كل شويه بيحسبها
ولا يتعفرت ولا يتحفلط
ولا تيجى عليه مره ويغلط
أيامو فرح لا جمع وطرح
ولا شفنا مره خيالو سرح
ولا يزعل ولا يبعد عنها
وان بعدت مايقرب منها
ويغمض عينو ويسبلها
ولا بينها وبينو بيسبلها
ولا يتحرنن ولا يتعظرن
ولا شفناه مره بيتقرنن
ولا يدايق من مصايبها
أرضها فرشتو وسماها غطاه
بسمتو ضحكتو دايما وياه
لا قريبو الصيف ولا عمو الشتا
من جوا نضيف ولا كييف عطا
ويسيبها تعدى تجيب وتودى 
جات أو راحت يللا ارتاحت
لا بيجرى يشيلها يحصلها
وان رجعت ولا بيبصلها
والدنيا عروسه نسبسبها
واللى بيكسبها اللى يسيبها