الدنيا فيها دا ودا
فيها الأصلى وفيها المغشوش
وفيها ناس حلوين كدا 
وفيها ناس زى الوحوش
فيها ناس ضحكتها تسر
تحس معاها بإنك حر
وناس قلبها زى الحجر
وابور ظلط ميكسروش
فيها صحيح ناس طيبه
سكر عسل وغريبه
وفيها كلاب متسيبه
لو مسكت عضم متسيبوش
وفيها ناس تهوى السلام
تحب تعيش دايما فوئام
وفيها يدوروا ع الخصام 
ويموتوا لو ملقيوهوش
وفيها ناس تلقاها زوق 
تبصلها دمك يروق 
وفيها اللى بياكلوا الحقوق
ولو لك حق متطولوش
فيها اللى بيه بنقتدى
بالبسمه دايما يبتدى
وفيها ناس بتعتدى
على الغلبان مترحموش
والدنيا فيها دا ودا 
فيها الأصلى وفيها المغشوش
وفيها ناس حلوين كدا 
وفيها ناس زى الوحوش