وانكتب عليا الحب والغرام من بدري 
وصبحت من أهل الهوي من غير ما ادرى
لما جاني اول حب حسيته بيه سكن جنبي 
وللفرح والهنا وداني لعالم تاني 
ومن دنيتي خدني وللعذاب وداني
وابتدا احساسي بيه يشغلني ويسعدني
ونوره وعبيره غطي وعطر شوارعنا وحيينا
ومالقيتش حد قلبه فرحان وسعيد زيينا
وحبيته حب كبير من غير مايعرف حبنا
ولقيت الحب جميل وغيرلي كل أحوالي 
وسرق من عيني النوم ايام وليالي
واتمنيته العمر كله ما يبعد عني ولا يوم
كنت باشوفه بدر منور السما ومزين النجوم
اتمنيته وهويته وأشتريته وعشقت عنيه 
واتمناه فؤآدي وفضلت رايح جاي أدور عليه
وزادت خطوتي ولهفتي وعيني مشتاقه لييه
نفسي في نظره منه تشفيني م اللي انا صبحت فيه 
وصبرني علي انتظاري بقالي سنين عايشها بافكر 
وابتدا مشوار حبي معاه وحال قلبي خلاص إتغير
وفاتت سنه وراها سنه وحبه جوايا عمال يكبر
وبقيت اشوف في عنيا كل شيء جميل ومنور
واملي اخلص دراستي وانول مرادي ويرتاح بالي
وصحيت م النوم في يوم علي زغاريد بترن في وداني
خطفت قلبي وجريت اسأل إيه السبب وكلي حيره 
وقبل مايعرفوا حكايتي قالولي ده فرح في بيت الجيره
ولقيت نفسي بابكي علي حالي وعلي حب مالحق يفرحني
كنت فاكره هيكون ليا وراح لغيري وفاتني
اتاريني حبيته وعمره ماحس بيا ولا بحبه وعدني
والحقيقه مهياش خيانه وغدر منه هي غلطه مني 
حب واتولد من طرف واحد وكبر جوايا غصب عني
واعمل ايه في قلبي اللي حبه من غير مايقوله 
ولا فكرت يوم اروحله وباللي في قلبي ابوحله
ولقيت نفسي باتمني السعاده وراحة البال لحبيب الروح
اما انا يصبرني ربي علي فراقه ويشفيلي قلبي المجروح
ويهوِّن عليا العذاب اللي هاعيشه في بُعده
بعد ماكنت باتمني افضل العمر كله عايش بقربه
ولقيت نفسي بلوم نفسي ليه نحب ناس بيحبوا غيرنا 
وليه نتعلق باوهام الحب ونعذب حياتنا وروحنا 
ده الحب ود ووصال عمره ماكان نظره من بعيد لبعيد.
ياريت نحب اللي يحبونا وهواهم شارينا والقلب يعيش سعيد
وليه نتعلق بحبال دايبه واحلامنا تموت جوانا ونقول حب جديد
والهوي اللي كان هيسعدنا يتعسنا ويعذبنا الحرمان
ونفضل سنين تايهين متعذبين وعايشين في وحده ورهبان
ليه نختار ونحتار ونمشي في طريق غير طريقنا وحياتنا تنهار
ونظلم الحب معانا ونقول كله لوعه وعذاب ومرار
دالحب جميل بينور حياتنا ويسعد قلوبنا لو أحّْسَنّْاَ الإختيار