معنى الحب مما قرأت
الحب مش حرفين وقلب و سَهم ناعِس عـِ الشَجَر
الحُب ترياق الحَرير
إن فات قلوب تصبَح حَجَر
الحُب زَغللة المَطَر
و شروق يبَدِل ألف ليل
موال طويل
الحُب أقرَب للسَما لما تبوس خَد النَخيل
يهدَى و يميل
و يِزخ عـَ العاشقين رُطَب
الحُب مالهوش مُعطيات
مالهوش ,, عشان
مالهوش سَبَب
مالهوش طريقة فـِ الكُتب
الحُب يعني ضَمتين أغلى من الماس و الدَهَب
وَهاب وَهَب
هداياه بتخبِل فـِ العقول
ميهمهوش سُمر و بياض
ميهمهوش لَو فَرق طول
لكن بيعرَف فـِ الأصول
إن الكلام لازم يكون مَحسوب على إد المقاس
مش أي قَلب هتشتهيه ,, ينفَع يكونلَك مـِ الأساس
أما البنات دول وِلد ناس
و الحُضن سَندة و نور
و وَعد
يا تكون مقارِب للأبد
يا من البداية تخاوي بُعد
الحَب عَهد
مكتوبهُ ـ فـ لإيدين الرِجال
مالهوش علاقة بالشِناب
ولا هيتاقلها بطولها مال
الحُب مِش لِعبة عيال
الحُب مِش مِنحة و سؤال
الحُب كلمة تصُد ريح , و تزيح هموم , و تهيل جبال
ومهوش مجال للمُغريات
يعني لا ينفَع يتكدِب
ولا حتى تاخدهُ مُهدئات
الحُب ذات
غَزل البنات
الحُب لَو موجود بجَد ,, هتشوفوا معنى المُعجزات