واللا زمان لما الحنان 
يجينا من سطح الجيران 
وييجى الشر من بيتنا 
ربى اهدينا وثبتنا
فتحنا بيتنا للغريب 
قام شكالو منا القريب 
بالذمه دا مش يبقى عجيب
لما اللى منا يسممنا
بدال ميقولو وجهنا 
يقولو كلام يشوهنا 
طالب منو يسفهنا
طعن الغريب مقدور عليه
لكن القريب يطعنا ليه
يتمنى ليه يتوهنا
ليه يطلع لينا من بيتنا
قريب واقف فسكتنا
ويحبطنا .. ويكبتنا
هوا الوفاء يبقى كدا 
تبات الخلق متنكدا 
من اللى بياكل فى قصعتنا
ليه بنلاقى فينا البعض
ينده لينا كلب يعض 
يحسو علينا ليه ينقض
جايبو عصايه تسكتنا
وتبكتنا .. وتعتتنا
واللا اللى صابعه بيوجعه 
ملوش علاج غير يقطعه 
شوف اللى يغدر واصفعه 
ومتسيبهوش يفتتنا