يا عظمة السلطان
ويا دولة الباشا
كلمه وبقالها زمان 
فى الحلق متحاشا
أنا هنا يا بيه 
تحتك سلامة الشوف 
سامعنى وللا إيه 
صوتى ماليه الخوف 
إحنا الناس المنسيه
والخلق مش سواسيه 
وصاك ربك علينا 
متعمل بالوصيه 
ياصاحب الأوسمه
القسمه متقسمه 
إنتوا بتاكلوا الكحكه
واحنا لنا السمسمه
تعليمكوا بالفلوس 
وتعليمنا بالدروس
أحب راسك وابوس
حاسب علينا تدوس
مكتوب فى كراريسنا 
مدارسكوا غير مدارسنا
لا عمرنا زعلنا 
ولا مره غلسنا 
عيانكوا يتعالج 
عيانا ليه بيموت 
هنا وفى الخارج 
فى حاجه مش مظبوط
سكنتوا ف الكمباوند 
شقق باصه ع البحر 
وممعناش ون باوند
نسكن ولا حتى فجحر
لبستم الماركات 
واحنا لبسنا بالات
إحنا نشقى ونتعب 
ماينوبنا إلا فتات
الطفل له سياره 
ومش لاقيين حماره
أو حتى عجله بتاره
يركب لها زماره
ربك بحالنا عالم 
بينا وبينكوا سلالم 
وحاجات كتير وحاجات 
درجات يابيه درجات 
واللى حاول يطلعها 
تعب ياكبدى ومات
يا عظمة السلطان 
ويا دولة الباشا 
كلمه وبقالها زمان 
فى الحلق متحاشا