أنا أَصلِىِ ف الأساس فَلاَح
كان عندى فدانين إصلاح
واخدهم أبويا عن جدى
وهما أغلى ما عَندى
وبقرتين وكام مِعزه
والنورج وكان ساقيه
وجَنب الأرض بيت بالطين
وبرضوا قول كمان قيراطين
زَارِعهم خُضره مع جَلاوين
عود رِيحان وعود ياسمين
شجرة مانجه ويا التين
وكُنت كمان بيهم راضى
ووسط عيالى ومراتى 
وكان بيتنا دا بيت عِيله
حَدَانا فُرن بالطينه
وكنا نولعه بالقش
وكان شَغَال ما يِعطَلش
دا عِيش فلاحى ما يكلفش
وحبة رز ف برامه
بحتة لحمه عَمرَانه
وكات السُقره إيه هيه
حَصيره ياناس وطَبليه
وكُنت أصحَا أنا بَدرى
أروح أجرى على أرضى
أراعى ربنا ف زرعى
قمح وقطن زرعتنا
وكان قُوتنا وفرحتنا
وكسوتنا وخزين بيتنا
ومنه نجوز اولادنا
وفجأه اتغيرت الاحوال
صَبَح الحال غير الحال
العِزبه بقت هُوجَه
ومِشيوا الناس مع الموجه
وراحوا فدانين الأرض
وبقينا نِقَلِد بعض
وبعد ما كات بيوت بالطين 
بقت عمارات تساوى ملايين
بقيت القصه عَاَرفينها
ومش محتاج أكملها
تغور الفوضى وسنينها
وعندى كلمتين تانيين
ليهم احنا محتاجين
ياريت نِرجَع لعادتنا
وتقاليدنا وأخلاقنا
دا حَل أكيد لأزماتنا