عيش بمزاجك 
كل واحد عاجبه حاله
و عاجبه مشيوه
اللي صالح واللي طالح
واللي ساقط واللي ناجح
كل مقتنع بعيشته
ومايقبلش حد يناقشه
الصراحه كله عايش لنفسه
والمصالح بقي شكلها
كل يوم بميت وش
النهارده بدله ومنصب يغش
ممكن يكون مزيف بكرش
ولا يكون بدقن وعمال يدش 
قال الله وقال الرسول 
وهو بيه مابيعملش
ماهي دنيا اللي فيها
علي كل شكل وكل لون
اللي تحسبه
عاقل يطلع مجنون
وكمان اللي تحسبه
موسي يطلع فرعون
زي المثل ما بيقول
واللي نازل رقص
واللي نازل لف
دنيا صدقني 
هجص في هجص
تصدق 
مين مافيش أمين
غير في الكمين
ماهي دنيا 
يا عم هيص 
حبه فرافيش 
خليك تعيش
وكله نازل نصب
وكله نازل كبش
والغلابه وسط الديابه
اللي نازلين فيهم
هبش ونتش
والاسم أننا بني آدمين
مخلوقين من طين
بس الطين نطيف
واحنا بقينا متوسخين
علي فين رايحيين
وصدق فينا القول
اخرتنا بقت طين
والغريب أننا بندعي 
ربنا
بعشم أوي ومطمنين
يعني تخيل
بنسرق بعضنا
ضيعنا 
نفسنا وعمرنا
وكل يوم بنصلي 
ونقول أمين
ونتعجب 
ونبقي مستغربين
الهم اللي احنا فيه 
مابيترفعش عننا
عمرك شفت
كده بني آدمين 
ادعوا مليون سنه
وقولوا أمين
هو سامع وهو مطلع
العيب فينا
لو اتعدلنا هيقبلنا 
في زمره التائبين
بس ادعوا بصدق
وقولوا امين