بلا فزلكه وبلا أنتكه
ياعم بطل لكلكه
خلاص عُلم إنك مُلم
لزومها إيه الفبركه
أخو الجزيره ملهش سيره 
ونفسو يوقف المسيره
بايع ناسو مسلم راسو 
حد يقولنا إيه إحساسو
وليل نهار عشا وفطار
يتمنى يولع فيها نار
طهأتنا .. وزهأتنا
يمين شمال شحطتنا 
نروح لفين محنش سامعين
ربك على الظالم معين
آه يا معلم لو تتسلم 
والنبى مهتلحق تتألم
ساعة الصباح وللا المسا
فى ودانا نازل وسوسا
لو حتى يكح نقولو صح
وإمتى التعلب يوم نصح
أيوه انتا يا خال منتش محتال 
منتش متواجد حيث المال 
إنتا الشرف منغير قرف 
ومولعاتى محترف
كلك حنان كلك إحسان 
ونعمل ايه فطولة اللسان
متسكتو يا جوز عمتو
واسأل بكام جاب بدلتو
ياسيد الناس فهمنا خلاص
إنتا الشهامه والإخلاص
منغير متقول نفهم على طول
الشعب مصحصح مش مسطول
وحياة مولانا الشيخ عاطل
واللى مبحلفشى بيه باطل
قول كلمة حق بلاش الزق
وحياتى عندك متقول لأ