أنا حُبّك
وكل الدنيا ف عيوني
فِدا حُبّك ،
يا أحلى عيوووون
ونبض القلب بيصبّح بنور ضيّك
لرب الكووووون
وحُسنك في الجمال آيه
وقصة كبيرة ،،وحكاااايه
بتاخد قلبي من قلبي
كإنك في الغرام ليلى وأنا المجنووووون
ومهما يكون
أنا ضلّك ...
وفاضلّك....
وجوه عيونك الحلوة
أسير مفتووووون
...........
بحبك
والكلام عاجز
يفُك الخط ف ملامحك
وبيسامحك
عشان الوصف ف محاسنك
لا ينفع فيه كلام ظاهر
ولا خارج عن الأحوااال
ولا مليون مجاز مرسل
ولا كناية ،،
ولا مواااال
يا صافيه زي نور قنديل
ف عِزّ الليل
مع المواويل
وصوت المايّه بيرفرف
على ضفاف الفرح ف النيل
........
يا نسمة حب فوّاحه
وجرّاحه.......
وجايّه من بلاد الشوق
على المعشوق
بكل الود والراحه
فيطرح قلبي من ودّك
جناين ورد طرّاحه
بترسم للعيون روحك
فينطق بالجمال بوحك
ويبقى الحسن مجروحك
لو حُسنك عليه هيميل
........
خديني لحُضنك الدافي
أنا الصافي
ومجدافي
حروفي اللي انزرع فيها نهار موصووووف
على مداد السَمَع والشوف
لا يعرف خوف
ولا عكاز ألم وظروووف
بحبك ياللي مالكاني ....
وغاوياااني ....
وبغزلّك هوايا حروووووف
ولو صاب الخَرَس نبضي
وجفّ النبع من أرضي
كفايه بروحك الحلوه
يعيش الوصف والموصووووف
كفايه بروحك الحلوه
يعيش الوصف والموصوف